今晚英联杯第4圈大战，力争「5连冠」嘅曼城作客「锤仔帮」韦斯咸。英联杯近年被视为豪门练兵地，曼城能够连续4年捧杯，一来系球队对呢项比赛态度认真，二来佢哋雄厚兵力冠绝英超，就算轮换亦可以维持战力；韦斯咸多线作战难免顾此失彼，曼城有力赢波晋级。

英联杯近年一直系曼城天下，自2014年开始8届冠军有6届落喺「蓝月亮」手上，包括哥迪奥拿领军后造出4连霸。呢位西班牙名帅亦唔止一次表示对英联杯冠军嘅重视，加上曼城兵多将广，每个位置都有超过一位星级球员竞争，强如史东斯及史达宁等英格兰国脚亦唔系必然正选，杯赛获派上阵自然要全力争取表现。

曼城上圈面对弱旅韦甘比，奇云迪布尼及菲尔科顿等主力都有上阵，配合几位U23新星，成功擦出火花，今场面对韦斯咸更加唔会掉以轻心。翻查纪录，曼城近年对韦斯咸甚有「格食格」味道，近11次正式赛事交锋，曼城录得10胜1和压倒性优势，食住上场联赛大炒白礼顿嘅气势，今仗抢Ｗ自然信心十足。

韦斯咸多线发展难兼顾

「锤仔帮」韦斯咸喺主帅莫耶斯带领下，近年成绩平稳冒升，上场英超以1比0小胜热刺后，更杀入联赛前4，不过佢哋今季同时要兼顾欧霸杯，喺有限兵源下，英联杯明显会被「牺牲」。睇番佢哋上圈虽然淘汰曼联，但该仗韦斯咸亦以大量后备上阵，能够晋级带啲幸运成分，今仗面对态度更认真、实力更劲嘅「克星」曼城，难逃输波出局厄运，一于热捧曼城客胜。