巴塞隆拿今季因为球王美斯离队，加上前教练朗奴高文领导无方，导致成绩差劣，一度喺首两场分组赛大败。不过，巴塞隆拿毕竟系欧联常客，仍然有一定根基，近两场欧联都赢波，升上第2位，领先第3位宾菲加2分，出线形势乐观。
最重要系巴塞隆拿喺国际赛期间，成功邀请名宿沙维回巢执教，呢位昔日中场大师喺球队史上有崇高地位及威望，深受球员敬重。沙维上任后亦立即推行严格纪律制度，提升球员专注力，以认真态度对待每场比赛，效果立竿见影，上场西甲首仗领军，击败同市死敌爱斯宾奴，取得好开始，来到今场争出线关键之战，巴塞众将必定搏命。
宾菲加喺首循环趁巴塞陷入低潮，主场大胜对手3比0，但之后两场对拜仁慕尼黑，都大败收场，证明佢哋实力同欧洲一线球队，仍然有一段距离。特别系宾菲加欧联作客成绩差，今届作客同组最弱嘅基辅戴拿模，只能打和0比0，今场造访鲁营，恐怕难以再制造爆冷赛果。
